سميح والانتقام ... فى اسبوع الالام
=====================
=====================
امير :ايه ده مالكم ياجماعة ؟ فيه ايه ياهانى ؟ خير ياجون ؟ بتزعقوا ليه ؟
هانى : سى جون ياسيدى بيهدنى انه ح يقول لاستاذ ثروت على الموضوع اللى فات ... وانا بقوله طب قوله كده وشوف انا ح اعمل ايه ؟
جون : انا ح انتقم منك على اللى انت عملته معايا الاحد اللى فات
امير : ياجماعة عيب الكلام ده ... ده انتوا اصحاب
هانى : ده انا مجهز لك مطب ياجون حاخلص منك القديم واالجديد
جون : انت ؟!! ياحبيبى انت ماتقدرشى على ... ابعد عنى احسن لك
امير : لالا .. عيب قوى كده الحقنى ياسميح .. الحقنى بسرعة
سميح : ايه مالك يا امير فيه ايه ؟ خير ياجماعة ؟!!
امير : خير ايه بس ؟!! هانى وجون عمالين يهددوا بعض .. وكل
واحد عمال يقول للتانى كلام غريب وانه ح ينتقم منه !!
سميح : انتقام ايه ده .. !! ده انا طول عمرى باتعلم من هانى الكلام الحلو !!
هانى : كلام حلو مع جون ده .. خلاص بطلت الكلام الحلو
سميح : ماتقولشى كده .. وانت ياجون طول عمرك هادى ووديع
جون : هادى ووديع بس مش مع سى هانى ده .. انا حاوريله
سميح : لا ياجماعة عيب كده .. ما انتوا ياما اتريقتوا على انا ....ومع ذلك عمرى مازعلت منكم .. زى ما انتم زعلانين كده من بعض .. ولا فكرت فى الانتقام منكم ... ده احنا داخلين على اسبوع الالام ... قدس اقداس السنة كلها .... معقولة كده ؟ معقولة تكون ديه افكارنا ؟ ... معقولة نقابل الام ربنا بالحقد والادانة والبغضة وعدم المحبة والكلام الفارغ عن الانتقام ؟ ...
ده بدل مانقعد نصلى كتير ونقدم توبة ونحاول نصلح نفسنا ونسيب اى حاجة ممكن تزعل ربنا وتخليه يتألم اكتر واكتر ؟
امير : الله ياسميح .. كنت فين من بدرى ؟
سميح : مش لازم انا اقول لكم الكلام ده ... ده انتم مفروض تعملوه لوحدكم .. وعموما لو حد لسه زعلان من التانى يمسحها فى انا ... ارشموا الصليب !!
هانى : خلاص ياسميح .. انا مش زعلان ..وعموما انا اسف ياجون
جون : ما تقولشى كده ياهانى ..... انا اللى اسف
سميح : قد ايه ربنا فرحان الان بيكم .. بدل الانتقام والكلام الفارغ .. انا عاوزك ياهانى ثوانى على جنب .
هانى : حاضر يا سميح .. بعد اذنك ياجون ... بعد اذنك يا امير
امير : اتفضل يا هانى .. ها خلاص ياجون ارتحت دلوقتى ؟
جون : فعلا كلام سميح ريحنى .. انا فعلا كنت غلطان وماكانش لازم اعمل كده واتكلم بعدم محبة واحط على لسانى كلام الانتقام ده ..
امير : معلش مش عيب اننا نغلط ... العيب اننا نكرر الغلط ومانتوبشى ... على فكرة سميح خلص مع هانى ... وبيشاور لك ... عاوزك انت كمان
جون : حاضر ح اروح له .. عن اذنك يا امير
امير : اتفضل ياجون ... اهلا ياهانى ... ها ارتحت بكلامك مع سميح
هانى : جدا سميح ده طلع بنى ادم حلو قوى ... فهمنى ازاى اعيش اسبوع الالام بمحبة وافكار حلوة بعيدة عن افكار الانتقام
امير : فعلا سميح ده طلع انسان كويس ... الواحد احيانا كان بيفهمه غلط
هانى : عندك حق ... مع اننا ياما اتريقنا عليه
امير : اهو سميح خلص مع جون وبيشاور انه عاوزنى ... عن اذنك ياهانى
هانى : اتفضل ياامير ... اهلا جون ... انا اسف تانى ياجون ...
جون : اانا اللى اسف يا هانى ..... ارجوك سامحنى
هانى : ماتقولشى كده ... انت اللى لازم تسامحنى ارجوك
امير : ايه الكلام الحلو اللى بسمعه ده .... على فكرة سميح اضطر يمشى علشان عنده ميعاد وبيسلم عليكم
مدحت : ازيكم ياجماعة ... باقول لكم هو سميح اخد منكم فلوس ؟
هانى : ايوه ده خد منى 20 جنيه قال لى انى غلطت فى حق جون وهات نجيب له هدية
جون : وقال لى نفس الكلام انى غلطت مع هانى ولازم نجيب له هدية وخد منى برضه 20 جنيه
امير : ايه ده ؟!! ده خد منى انا كمان 20 جنيه قال لى ح نشترك
انا وهو فى هدية لهانى وجون بمناسبة الصلح
مدحت : يانهار ابيض .... ده قال لى انه كان مستنى اى فرصة وانه هاياخد من كل واحد فيكم 20 جنيه ومش هيرجعها لكم تانى الا بعد فترة ... علشان اتريقتوا عليه من شهرين وده انتقاما منكم علشان ماتتريقوش عليه تانى
الجميع : آآآآآآآآآآآآآآآآآآآآآآآآآآآآآآآه سميح ح يفضل سميح !!!!!!!!
أصيل قوى سميح ده
بجد موضوع تحفة مش ممكن حلو اوي انا بس نفسي اعرف سميح دا فين وبتجيبوا حكاياته منين ؟؟؟ ياريت يا تاسوني تحطيلنا قصص لسميح دي اكتر من كدة لانها فعلا حلوة وليها هدف.
لالالالالالالالالالا ده سر المهنة
انت عاوز تاخد منى الشغل وانا اعمل ايه بقى
لكن كل ماسميح بيكون عنده جديد بنزله على طول
انا عارفة ماما بتجيب قصص سميح منين `15` بس مش هقول لك
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.